Փաշինյանի ելույթի հաջորդ գիշերը ես սպառնալից նամակ եմ ստացել, որի վերաբերյալ քրեական գործ կա հարուցված. Էդմոն Մարուքյան

ԱԺ-ում շարունավում է ատելության խոսքը քրեականացնելու մասին օրինագծի քննարկումները: Էդմոն Մարուքյանը օրինագծի քննարկման ժամանակ իր ելույթում մեղադրանքներ հնչեցրեց իշխանության հասցեին՝ նշելով, որ հենց իշխանություններն են ատելության խոսք քարոզում:

«Իշխանության ներկայացուցիչները պնդում են, որ իշխանությունը ատելություն չի քարոզում, շատ լավն է: Մենք չգիտենք, թե ովքեր են այդ քարոզը անում: Բայց երբեք իշխանության ներկայացուցիչները չեն դատապարտում ատելության խոսքը: Ինչու՞, որովհետև իրենց ձեռնտու է, նրանց աջակցող խոսք է: Որ օրը ատելության այդ խոսքը ձեզ չաջակցի, այդ ժամանակ այս հոդվածը կսկսեք կիրառել»,- նշեց նա:

Էդմոն Մարուքյանը անդրադարձավ նաև Նիկոլ Փաշինյանի՝ իրենց հասցեագրված հայտարարությանը:

«Երբ Փաշինյանը մեզ հայտատարեց որպես հակապետական ուժեր, ես ստանում եմ բազմաթիվ նամակներ, որ մենք «հակա» ենք: Այդ ելույթի հաջորդ գիշերը ես սպառնալից նամակ եմ ստացել, որի վերաբերյալ քրեական գործ կա հարուցված: Դրանք բոլորը ձեր աջակիցներն են»:

Ըստ Մարուքյանի՝ համացանցում իշխանության հասցեին հնչեցված քննադատական խոսքը փորձ է արվում լռեցնել հայհոյանքով և զրպարտության խոսքով՝ վստահեցնելով, որ այդ նպատակին են ծառայում յութուբյան մի շարք ալիքներ:

«Եվ դրան է գումարվում ձեզ աջակցող յութուբյան ալիքները, որոնք  մարդկանց մասին տեսանյութեր են պատրաստում և դրանք ամեն օր վարկաբեկում են մարդկանց: Եվ դուք ամեն օր ասում եք, որ մենք մեդիա չունենք»,- ելույթի վերջում ավելացնելով՝ այս հոդվածը ձեր մասին է: