կարևոր
1330 դիտում, 2 տարի առաջ - 2020-02-09 16:09

Ենթակառուցվածքների անխափան աշխատանքի համար կներդրվեն առավելագույն ջանքեր. ԱՀ պետական նախարար

Ենթակառուցվածքների անխափան աշխատանքի համար կներդրվեն առավելագույն ջանքեր. ԱՀ պետական նախարար

Արցախի Հանրապետության պետական նախարար Գրիգորի Մարտիրոսյանը փետրվարի 9-ին հրավիրել է խորհրդակցություն՝ նվիրված հանրապետությունում տեղացած առատ ձյան հետևանքով առաջացած խնդիրներին ու այդ ուղղությամբ իրականացվող աշխատանքներին:

ԱՀ պետական նախարարի աշխատակազմի տեղեկատվության և հասարակայնության հետ կապերի բաժնից հաղորդում են, որ համապատասխան տեղեկատվությամբ հանդես են եկել քաղաքաշինության նախարար  Կարեն Շահրամանյանը, արտակարգ իրավիճակների պետական ծառայության տնօրեն Վլադիկ Խաչատրյանը, Ստեփանակերտի քաղաքապետ Դավիթ Սարգսյանը:

Իր խոսքում ԱԻՊԾ տնօրեն Վլադիկ Խաչատրյանը նշել է, որ առավոտյան ներհանրապետական բոլոր ուղղություններով ճանապարհներն անցանելի էին, փակ էր միայն Քարվաճառ-Սոթք հատվածը: Չնայած ճանապարհը բացել և իրականացվել են աղցանման աշխատանքներ՝ այն օրվա ընթացքում  շարունակում էր մնալ դժվարանցանելի: Վլադիկ Խաչատրյանը նշել է, որ ծառայությունը  թեժ գծի միջոցով  և առցանց հարթակում բնակչության հետ ապահովում է հետադարձ կապը՝ հորդորելով գիշերային ժամերին երթևեկել խիստ անհրաժեշտության դեպքում:

Քաղաքապետ Դավիթ Սարգսյանի հավաստմամբ՝ մայրաքաղաքում ձնամաքրման աշխատանքները մեկնարկել են վաղ առավոտյան՝ ապահովելով մայրաքաղաքի բնականոն երթևեկը:

Հաշվի առնելով, որ այս օրերին պաշտպանության բանակում տեղի ունենում երդման արարողություններ՝ պաշտպանության նախարար Կարեն Աբրահամյանը ներկայացրել է զինծառայողների ընտանիքների ապահով տեղաշարժի ուղղությամբ իրականացվող աշխատանքները՝ ակնկալելով այդ հարցում նաև համապատասխան գերատեսչությունների աջակցությունը:

Պետական նախարարը վստահեցրել է, որ ենթակառուցվածքների անխափան աշխատանքի համար կներդրվեն առավելագույն ջանքեր:

Հանրապետության որոշ հատվածներում էլեկտրաէներգիայի խափանումներ են եղել, աշխատանքներ են իրականացում մատակարարումը վերականգնելու ուղղությամբ:

Գրիգորի Մարտիրոսյանը ընդգծել է աշխատանքների օպերատիվությունն ու հետևողականությունն ապահովելու ՝ հարկ եղած դեպքում աշխատուժն ու տեխնիկական միջոցներն ավելացնելով անհրաժեշտությունը: