Դոնալդ Թրամփ. «Ես կցանկանայի իմ աղոթքները հղել…»

Այդ րոպեներին ավարտվում Էր ամերիկացի փոփ երգչուհի Արիանա Գրանդեի համերգը։
manchestr-paytyun
ԱՄՆ-ի նախագահ Դոնալդ Թրամփը ցավակցություն Է հայտնել բրիտանական Մանչեսթրում պայթյունից զոհվածների ու տուժածների հարազատներին ու մերձավորներին։
«ԱՄՆ-ի ժողովրդի անունից ես կցանկանայի իմ աղոթքները հղել Մեծ Բրիտանիայի Մանչեսթրի բնակիչներին, ես ցավակցություն եմ հայտնում նրանց, ովքեր տուժել են ահաբեկչական այդ գրոհից, զոհվածների ընտանիքներին ու մերձավորներին», ասել Է Թրամփը Բեթղեհեմում Պաղեստինյան ազգային վարչակազմի ղեկավար Մահմուդ Աբասի հետ համատեղ անցկացված մամուլի ասուլիսում, որը հեռարձակում Էր CNN հեռուստաալիքը:
Ըստ վերջին տվյալների՝ Մանչեսթրում տեղի ունեցած պայթյունի հետեւանքով զոհվել Է 22 մարդ, վիրավորվել Է 59-ը: Անգլիայի Մանչեսթր քաղաքի ծածկած մարզադաշտում պայթյունը որոտացել Է տեղական ժամանակով ժամը 22:35-ին (Երեւանի ժամանակով ժամը 01:35-ին): Այդ րոպեներին ավարտվում Էր ամերիկացի փոփ երգչուհի Արիանա Գրանդեի համերգը, որին ներկա Էր մի քանի հազար մարդ, այդ թվում՝ մեծ թվով երեխաներ եւ դեռահասներ:
Իշխանությունները կատարվածը գնահատել են որպես ահաբեկչական գործողություն, հաղորդել Է ՌԻԱ Նովոստին:

 

*

*