Լեհական ՏՏ ընկերությունների պատվերները կփոխանցվեն Գյումրիի ծրագրավորողներին — Երկիր Մեդիա

Լեհական ՏՏ ընկերությունների պատվերները կփոխանցվեն Գյումրիի ծրագրավորողներին

Շիրակի մարզպետը կարևորեց միջազգային կազմակերպությունների, ձեռնարկությունների հետ համագործակցությունը

Փետրվարի 7-ին Շիրակի մարզպետ Արթուր Խաչատրյանը հյուրընկալեց Լեհաստանում Հայաստանի Զարգացման հիմնադրամի պաշտոնական ներկայացուցիչ, «Blue Idea» ընկերության նախագահ Լուկաշ Վալերյանին: Մարզպետի հետ հանդիպման ժամանակ Լ. Վալերյանը հայտարարեց նոր գործի մեկնարկի մասին։ ՀԶՀ ներկայացուցիչը լեհական ՏՏ ընկերությունների պատվերները կհավաքագրի և կփոխանցի Գյումրիի Տեխնոլոգիական կենտրոնի մասնագետներին ու ստարտափերին։

Գործարարը նշեց, որ պատվերները հիմնականում կառնչվեն Big Data, Software, Web Design և այլ տեխնոլոգիական խնդիրների։

Ողջունելով հյուրին՝ Շիրակի մարզպետ Արթուր Խաչատրյանը կարևորեց միջազգային կազմակերպությունների, ձեռնարկությունների հետ համագործակցությունը. «Մենք շատ կարևորում ենք այսպիսի համագործակցույթունը երեք պատճառներով։ Նախ, որ դա առաջավոր փորձի ընդօրինակման ու յուրացման հնարավորություն է տալիս, երկրորդը` նոր շուկաներ դուրս գալու հնարավորությունն է մեծացնում, երրորդը` լրացուցիչ ֆինասական հնարավորություններ են ընձեռվում: Գիտելիքի դարաշրջանում միայն նորարարության վրա հիմնված տնտեսությունը կարող է մրցունակ լինել, այնպես, որ մենք միայն ուրախ կլինենք, որ ձեր փորձը Գյումրի բերվի, զարգացման միտումներն առավել արագ կընթանան»:

Ավելի ուշ սպասվում է «Blue Idea» ընկերության հայաստանյան մասնաճյուղի բացումը, որի տնօրենն արդեն նշանակված է։

*

*