«Ես կառչած չեմ աթոռից, ավելին՝ մոռացել եմ իմ երեխաներին, ընտանիքը, ընկերությանը». ԵՊՀ ռեկտոր

Այսօր լրագրողների հետ կայացած զրույցում  ԵՊՀ ռեկտոր Արամ Սիմոնյանը պարզաբանեց, որ բուհի գնումների մասով թվեր են հրապարակում, բայց չեն ասում, թե իրականում ինչի վրա է այդ գումարը ծախսվել. «Մենք 2 մլն դրամ արժողությամբ նստարան չունենք ԵՊՀ-ում, սխալ է ներկայացվել»,-ասել է նա:

Ռեկտորը նշեց, որ իրականում 2 մլն դրամով իրենք ոչ թե մեկ նստարան, այլ 100 երկաթե աթոռ և 40 ուսանողական նստարան են գնել:

«Դուք հիմա իմ սենյակում թանկարժեք կահույք տեսնո՞ւմ եք: Եթե ես գնեի թանկարժեք գույք կամ աթոռ, իմ աթոռն այս վիճակում կլինե՞ր: Սա 12 տարվա աթոռ է: Դուք մի′ կարծեք, որ ես, այստեղ նստած, վայելում եմ էս դիրքս: Ռեկտորի աշխատանքը ծանր և անշնորհակալ աշխատանք է. ես մոռացել եմ իմ երեխաներին, ընտանիքը, ընկերությանը, հարազատներին: Առավոտից մինչ ուշ երեկո ես զբաղված եմ այս գործերով, և մի′ կարծեք, որ դա այնքան քաղցր է, որ ես կառչել եմ իմ աթոռից»,- ասաց Արամ Սիմոնյանը: