Թուրքիայում սահմանադրական փոփոխությունների քննարկումներն ուղեկցվել են ծեծկռտուքով

Քեմալական Հանրապետական ժողովրդական կուսակցության անդամները գրավել են ամբիոնը:
turqia-ceckrtuq

Թուրքիայի Ազգային մեծ ժողովում սահմանադրական փոփոխությունների քննարկումներն ուղեկցվել են ծեծկռտուքով: Այս մասին տեղեկացնում է թուրքական «Անադոլու» գործակալությունը:

Սահմանադրական փոփոխությունների դեմ հանդես եկող քեմալական Հանրապետական ժողովրդական կուսակցության անդամները գրավել են ամբիոնը, ինչին խառնվել են իշխող «Արդարություն և զարգացում» կուսակցության ներկայացուցիչները: Արդյունքում ընդդիմադիր և իշխանական պատգամավորները սկսել են բռունցքներով հարվածել միմյանց: Նրանցից մի քանիսը վիրավորվել են: Իշխող կուսակցության փոխնախագահ Ֆաթիհ Շահինն անգամ կոտրել է քիթը: Վնասվել է հիմնական ամբիոնը, որը հիմքից պոկվել է:

Մեջլիսում գաղտնի քվեարկության արդյունքում 341 կողմ և 139 դեմ ձայներով ընդունվել է սահմանադրական փոփոխությունների երրորդ հոդվածը, որը նախատեսում է պատգամավոր ընտրվելու տարիքը 25-ից իջեցնել 18-ի: Բացի այդ, զինվորականության հետ կապ ունեցողներն այդ հոդվածով չեն կարողանալու դառնալ պատգամավոր:

343 կողմ և 139 դեմ ձայներով ընդունվել է չորրորդ հոդվածը, որով այսուհետ մեջլիսի ընտրությունները պետք է անցկացվեն ոչ թե 4, այլ 5 տարին մեկ: 5 տարին մեկ են անցկացվելու նաև նախագահական ընտրությունները: Ընդ որում, երկու ընտրություններն էլ այսուհետ պետք է կատարվեն միևնույն օրը:

Մեջլիսում ընդունվել է նաև փոփոխությունների առաջարկի հինգերորդ հոդվածը, որը վերաբերում է մեջլիսի լիազորություններին:

Նախօրեին կայացած քննարկմանը Թուրքիայի Ազգային մեծ ժողովն ընդունել էր սահմանադրական փոփոխությունների առաջարկի առաջին երկու հոդվածները:

*

*