Թուրքիայի մտավորականները՝ արտակարգ դրության դեմ

Նրանք ևս մեկ անգամ ընդգծել են, որ չեն ճանաչում ապրիլի 16-ի սահմանադրական հանրաքվեի արդյունքները:
turqia-vostikan

artsakhpress.am-Թուրքիայում մի խումբ մտավորականներ հանդես են եկել կոչով՝ հորդորելով երկրում վերացնել մի քանի ամիս շարունակվող արտակարգ դրությունը:

Այս մասին հայտնում է թուրքական «Ջումհուրիեթ»-ը:

Մտավորականներին անհանգստացնում է երկրում տիրող մթնոլորտը, ատելությունը, օրենքների խախտումները, իրավունքների իրացման ազատության սահմանափակումը, կյանքի և ունեցվածքի ապահովության պակասը:

«Մենք «ոչ» ենք ասում մեկ մարդու ռեժիմին, անարդարությանը և անիրավությանը, ցանկացած ընդդիմադիր գործչի նկատմամբ գործադրվող ճնշմանը և սպառնալիքներին, հարյուր հազարավոր հանրային աշխատողների, քաղաքական գործիչների, ակադեմիկոսների, լրատվամիջոցների ու դատական համակարգի ներկայացուցիչների անիրավ, անօրեն, կամայական ազատումներին»,- ասվում է մտավորականների հայտարարության մեջ:

Նրանք ևս մեկ անգամ ընդգծել են, որ չեն ճանաչում ապրիլի 16-ի սահմանադրական հանրաքվեի արդյունքները: Մտավորականները հայտնել են, որ նորից անվտանգ պայմաններում ապրելու համար անհրաժեշտ է հրատապ կերպով վերացնել իրավական խախտումների հանգեցրած արտակարգ դրությունը:

Հայտարարությունը ստորագրել են իրավապաշտպան Աքըն Բիրդալը, գրող, հրապարակախոս Բասքըն Օրանը, նախկին պատգամավոր Բիննազ Թոփրաքը, գրող, լրագրող Լևենթ Գյուլթեքինը, նախկին պատգամավոր Ուֆուք Ուրասը և այլոք:

Թուրքիայում արտակարգ դրություն է հայտարարվել 2016 թվականի հուլիսի 15-ի ռազմական հեղաշրջման փորձից հետո` հուլիսի 20-ին: 90 օր շարունակվող արտակարգ դրությունը Ազգային անվտանգության խորհրդի որոշմամբ հոկտեմբերի 11-ին, ապա նաև հունվարի 3-ին երկարաձգվել էր 90-ական օրով: 

 

*

*

Լրահոս

Բոլոր նորությունները