Արդարադատության նախարարը հանդիպել է ցմահ դատապարտյալների հետ

Զրույցում դատապարտյալները բարձրացրել են վաղաժամկետ ազատման ինստիտուտի հարցը
rustam-badasyan

Արդարադատության նախարար Ռուստամ Բադասյանն այսօր այցելել է «Նուբարաշեն» քրեակատարողական հիմնարկ եւ Քրեակատարողական ծառայության պետ Արթուր Գոյունյանի ուղեկցությամբ շրջայց կատարել կառույցի տարածքում, հետեւել քրեակատարողական հիմնարկում ընթացող վերանորոգման աշխատանքներին: Այս մասին հայտնում է նախարարության մամուլի ծառայությունը:

Հիշեցնենք, որ Կառավարությունն ամիսներ առաջ վերջին տասը տարիների ընթացքում առաջին անգամ ՀՀ պետական բյուջեից քրեակատարողական համակարգի պահպանման համար կապիտալ վերանորոգման նպատակով 270 միլիոն դրամ հատկացրեց «Նուբարաշեն», «Վարդաշեն» եւ «Սեւան»  ՔԿՀ-ներում պահվող դատապարտյալների եւ կալանավորված անձանց բնակության կոմունալ-կենցաղային պայմանների բարելավման համար:

Արդարադատության նախարարը ծանոթացել է նաեւ դատապարտված եւ կալանավորված անձանց պահման պայմաններին, դատապարտյալների առողջության առաջնային պահպանման համար ՔԿՀ-ում առկա հնարավորություններին, սննդի պատրաստման պայմաններին, զրուցել դատապարտյալների հետ:

Ցմահ դատապարտյալները նախարար Բադասյանի հետ զրույցում բարձրացրել են վաղաժամկետ ազատման ինստիտուտը կատարելագործելու եւ ռեժիմների փոփոխության հարցերը, ինչին ի պատասխան՝ Ռուստամ Բադասյանը նշել է, որ նախարարությունն աշխատանքներ է իրականացնում ցմահ դատապարտյալներին օրենսդրորեն ընձեռված հնարավորությունները գործնականում իրացնելու ուղղությամբ:

Շրջայցին ներկա են եղել նաեւ ՀՀ արդարադատության նախարարի տեղակալ Սրբուհի Գալյանը եւ ԱՆ ՔԿԾ պետի տեղակալ Վահե Պապոյանը:

*

*