ՀՀ-ի հետ ցանկացած բնագավառում երկկողմ հարաբերությունները զարգացնելու մեծ ներուժ կա

Փետրվարի 10-ին Լիբանանում ՀՀ դեսպան Սամվել Մկրտչյանը հանդիպեց Լիբանանի պաշտպանության նախարար Յակուբ Սարաֆի հետ:
hh,-libanan

Փետրվարի 10-ին Լիբանանում ՀՀ դեսպան Սամվել Մկրտչյանը հանդիպեց Լիբանանի պաշտպանության նախարար Յակուբ Սարաֆի հետ:

Նախարար Սարաֆը գոհունակություն հայտնեց հայ-լիբանանյան հարաբերությունների վերաբերյալ և վստահեցրեց, որ Լիբանանի գործընկերների շարքում Հայաստանն այն երկիրն է, որի հետ ցանկացած բնագավառում երկկողմ հարաբերությունները զարգացնելու և ընդլայնելու համար առկա է մեծ ներուժ, այդ թվում՝ պաշտպանության բնագավառում:

Դեսպան Մկրտչյանը կարևորեց երկու բարեկամ երկրների բազմաբնույթ համագործակցությունը, որի շրջանակներում ռազմատեխնիկական ոլորտը ևս հեռանկարային է:

Դեսպանը պաշտպանության նախարարի հետ քննարկեց Հայաստանի և Լիբանանի միջև Ռազմական համագործակցության վերաբերյալ համաձայնագրի նախագծի համաձայնեցման ընթացքը: Կարևորվեց կողմերի միջև արդեն իսկ նախաձեռնված ռազմատեխնիկական համագործակցության ծրագրերի շրջանակներում գործնական քայլերի իրականացման անհրաժեշտությունը: Համաձայնություն ձեռք բերվեց այդ ուղղությամբ լրացուցիչ աշխատանքային հանդիպումների անցկացման շուրջ:

Դեսպան Մկրտչյանը և նախարար Սարաֆը մտքեր փոխանակեցին տարածաշրջանային զարգացումների, Լիբանանի ներքին և արտաքին անվտանգության սպառնալիքների և դրանց արդյունավետ դիմակայման գործում զինված ուժերի դերակատարության շուրջ:
Հանդիպմանը մասնակցում էր Լիբանանի պաշտպանության նախարարի գլխավոր խորհրդական, գեներալ Փանոս Մանջյանը:

*

*