«Չեմ կարծում, որ Վենետիկի հանձնաժողովն ասել է` ընդունեք քաղաքացի Վարդուշի առաջարկը»

Ընտրական օրենսգրքի շուրջ ձևավորված ԱԺ աշխատանքային խմբի հերթական նիստում...
yntrakan-orensgirq-ioanisyan-rustamyan-aj4 (1)

yerkir.am-Մեկնարկել է Ընտրական օրենսգրքի շուրջ ձևավորված ԱԺ աշխատանքային խմբի հերթական նիստը: Այս անգամ այն նախագահում է ԱԺ ՀՅԴ խմբակցության ղեկավար Արմեն Ռուստամյանը:

Հիշեցնենք, որ նախորդ երեք նիստերին ներկա չէր կառավարության ներկայացուցիչը, սակայն այսօր եկել է վարչապետին առընթեր ԸՕ բարեփոխումների հանձնաժողովի քարտուղար Դանիել Իոաննիսյանը:

Ռուստամյանն ասաց, որ նիստի հիմնական քննարկման հարցը պետք է լինի կառավարության տեսակետները լսելը և հասկանալը` ԸՕ-ի մասին մեկ փաստաթո՞ւղթ, թե՞ երկու փաստաթուղթ է գնալու ԱԺ` քննարկման:

Նշենք, որ քննարկումները բավականին թեժ են ընթանում: Վարչապետի կողմից ձևավորված հանձնաժողովը, ըստ էության, մտադիր չէ իր աշխատանքը համատեղել ԱԺ-ի հանձնախմբի հետ:

Իոաննիսյանը նշեց, որ վարչապետին առընթեր հանձնաժողովը մասնագիտական է` իրենք լսում և քննարկում են բոլոր առաջարկները` անկախ նրանից, թե ով է առաջարկը ներկայացնողը: Ըստ նրա` թեև ԱԺ քննարկումներին ներկա չի եղել, բայց լսել են քննարկվող հարցերը, և դրանցից շատերն ընդգրկվել են իրենց հայեցակարգում:

Իոաննիսյանը նաև ասաց, որ չի պատկերացնում` ինչպես կարող են երկու հանձնաժողովների աշխատանքները համատեղել: «Մեր հանձնախումբը մասնագիտական է, այստեղ չենք գալու` բազար անենք, ուզում ենք լսել առաջարկություններ»,- ասաց նա:

«Բազար» բառի համար դիտողություններից հետո Իոաննիսյանը մեղմեց ասածը: Մասնավորապես` արձագանքեց նիստը վարող Արմեն Ռուստամյանը: «Ի՞նչ է, մենք այստեղ բազա՞ր ենք անում»,- հարցրեց նա: Իոաննիսյանը պատասխանեց, որ գուցե բառը ճիշտ չի ընտրել, բայց ԱԺ հանձնաժողովը քաղաքական է, և ամեն դեպքում քաղաքական դիրքորոշումներ են ներկայացնում, ի տարբերություն իրենց` մասնագիտական խմբի:

«Ծառուկյան» խմբակցությունը ներկայացնող Նաիրա Զոհրաբյանը հիշեցրեց, որ թե իրենց խումբը և կառավարության հանձնախումբը հանդիպել են Վենետիկի հանձնաժողովի ներկայացուցիչների հետ, և վստահ է, որ երկուսին էլ նույն բանն է ասվել՝ իրենց համար ընդունելի է այն տարբերակը, որը կընդունվի քաղաքական կոնսենսուսով:

«Ես հասկանում եմ, որ դուք հարգում եք հպարտ քաղաքացիների կարծիքը, բայց չեմ կարծում, որ Վենետիկի հանձնաժողովն ասել է` ընդունեք քաղաքացի Վարդուշի առաջարկը քաղաքական աշխատանքից վեր: Մենք ասում ենք` սիզիփոսյան աշխատանք չանելու համար անենք համատեղ աշխատանք»,- ասաց նա:

ՀՀԿ ներկայացուցիչ Վիգեն Սարգսյանն էլ նշեց, որ տարածված մոլորություն է, որ քաղաքացիական հասարակությունը պետք է կառավարի պետությունը: «Եթե դուք պնդում եք` մասնագիտական հանձնաժողով եք, այդ դեպքում` ո՞վ է շարադրել պատվերը»,-հարցրեց նա:

Կառավարության հանձնախմբի ներկայացուցիչը նշեց, թե պատվեր պետք չէ իջեցնել, իրենք աշխատում են ներառական ձևով, այլ ոչ թե այնպես, ինչպես արվում էր նախկինում՝ գաղտնի:

Վիգեն Սարգսյանն արձագանքեց. «Ի՞նչ եք խոսում, ի՞նչ գաղտնի: Բոլորը եղել է ժողովրդի աչքի առաջ, բոլոր քաղաքական ուժերի կոնսենսուսով»:

Դանիել Իոաննիսյանն էլ ասաց. «Մի‘ ստիպեք` ամեն ինչ այստեղ հիշեցնեմ»:

Սարգսյանը նրան հորդորեց կարդալ դպրոցական` պետության և իրավունքի դասագրքերը, ապա հարցրեց. «Ի՞նչ փորձառություն ունեք ԸՕ գրելու համար: ԸՕ-ն քաղաքական փաստաթուղթ է, ոչ թե իրավական: Ո՞ւմ կամքն է ձևավորում հանձնաժողովը»:

Իոաննիսյանն էլ պատասխանեց, որ դա վարչապետի նախընտրական խոստման և կառավարության ծրագրի համաձայն է արվում: «Ես չգիտեմ` միգուցե քաղաքացիներին տրված նախընտրական խոստման ինստիտուտը թերագնահատված է ձեզ մոտ, բայց դա կարևոր է»,- ասաց նա:

«Ելք»-ի պատգամավոր Ալեն Սիմոնյանն էլ նշեց, որ չի հասկանում` այստեղ ինչ է քննարկվում: «Այստեղ մուսկուլներով խաղ է գնում, ես պատրաստ չեմ նստել, դա լսել, ճիշտ կլինի հասկանալ` ի՞նչ ենք քննարկում, և Իոաննիսյանն ի՞նչ է այստեղ ներկայացնելու»,- ասաց նա:

ՀՅԴ-ական պատգամավոր Սպարտակ Սեյրանյանն էլ նշեց, որ ինքն էլ սկսում է չհասկանալ` ինչ է քննարկվում: «Խնդիրը հետևյալն  է` կա խորհրդարան, որը պետք է ընդունի ԸՕ նոր տարբերակ: Ի վերջո, խորհրդարանն է քվեարկելու, դրա համար խորհրդարանի խմբակցությունները մեկ բան են ասում` եթե կան հակասություններ, չբերենք ու այդ օրը քննարկենք, այլ ընդունենք մեկ նախագիծ, որն ավելի հեշտ կքննարկվի և կքվեարկվի խորհրդարանում»,- ասաց նա:

ՀՀԿ ներկայացուցիչ Արփինե Հովհաննիսյանն էլ հստակեցրեց, որ եթե Իոաննիսյանը չի կարող որոշ հարցերի պատասխանել, ապա պետք է սպասել առաջին փոխվարչապետ Արարատ Միրզոյանին, և որ իրենց հարցը մեկն է` կառավարության հանձնախմբի հայեցակարգը ներկայացնելուց առաջ պատշաճ ձևաչափով քննարկումներ լինելո՞ւ են, թե՞ ոչ:

Իոաննիսյանն ասաց, որ լինելու են, բայց վստահ չէ, որ կառավարության ներկայացրած փաստաթուղթը կլինի կոնսենսուսային:

Արմեն Ռուստամյանը մեկ անգամ ևս փորձեց պարզել` կառավարությունը հանդես է գալու առանձի՞ն օրենսդրական նախաձեռնությամբ: Իոաննիսյանը պատասխանեց, որ ենթադրում է` այո, իրենց հանձնախումբը կմշակի փաստաթուղթը, կառավարությունը կներկայացնի ԱԺ:

Ի վերջո, եկան եզրակացության, որ առայժմ Իոաննիսյանը ներկայացնի կառավարության հստակ մշակված կետերը` կապված ԸՕ բարեփոխումների հետ:

*

*