Ղազախական ընկերությունները հետաքրքրված են Հայաստանի շուկայով

Դեսպան Թիմուր Ուրազաևի խոսքով երկու երկրների միջև հակասություններ չկան
xazaxstani-despan

Հայաստանի ու Ղազախստանի հարաբերություններում շարունակում է պահպանվել բարձր մակարդակ: Երևանում մայիսի 27-ին կայացած մամուլի ասուլիսում այս մասին նշեց Հայաստանում Ղազախստանի արտակարգ և լիազոր դեսպան Թիմուր Ուրազաևն՝ ընդգծելով, որ երկու երկրների միջև հակասություններ չկան:

«Ինչ վերաբերում է առևտրաշրջանառությանը, ապա ասեմ՝ այն երեք տարիները, որ ես այստեղ աշխատում եմ, ցույց են տալիս, որ աճն ակնհայտ է: Մասնավորապես, 2017 թվականին, առևտրաշրջանառությունն ավելացել է 2.5 մլն դոլարով, որը մոտ 28 տոկոս է, 2018 թվականին աճը կազմել է 50- 52 տոկոս»,- ասաց դեսպանը: Նա նշեց, որ եթե երկու երկրների բիզնեսի փոխադարձ հետաքրքրությունները դրվեն համակարգված հիմքի վրա, ապա լուրջ արդյունքներ կլինեն: Դեսպանը նկատեց, որ հայկական ապրանքների արտահանումը Ղազախստան աճում է: Առաջին տեղում գինու, կոնյակի արտահանումն է, որը 2016 թվականին կազմում էր 22 տոկոս, իսկ վերջին տվյալներով հասել է 38-ի: Երկրորդ տեղում թանկարժեք զարդերն են, որով միշտ առանձնացել են հայ վարպետները:

Ղազախական ընկերությունները հետաքրքրված են Հայաստանի շուկայով: Դեսպանի խոսքով, բացի այն, որ մի շարք ոլորտներում ղազախական ընկերությունները ներկայացված են, այժմ, հետաքրքրություն է նկատվում ապրանքների վերամշակման, ինչպես նաև  նավթամթերքի վաճառքի ուղղությամբ՝ բենզին, յուղեր և այլն:

Թիմուր Ուրազաևը նկատեց, որ Ղազախստանը հետաքրքրված է ՏՏ ոլորտում Հայաստանի փորձով: Նա առանձնացրեց «Թումո» ստեղծարար տեխնոլոգիաների կենտրոնի փորձը:

«Ակնկալում ենք, որ նման կենտրոն կբացվի նաև Ղազախստանում: Մենք հետաքրքրված ենք նաև կրթական այլ ծրագրերով՝ կապված տեղեկատվական տեխնոլոգիաների հետ: Ղազախական գործընկերները ներկայում քննարկումներ են անցկացնում համատեղ ծրագրերի իրականացման համար»,- ասաց Թիմուր Ուրազաևը:

*

*

Լրահոս

Բոլոր նորությունները