Հայաստան է ժամանել Քուվեյթի շեյխուհին

Ճանաչողական այցի շրջանակում շեյխուհին կայցելի մի շարք տեսարժան վայրեր և մշակութային հաստատություններ

Հանրապետության նախագահի տիկին Նունե Սարգսյանի հրավերով Հայաստան է ժամանել Քուվեյթի շեյխուհի, Քուվեյթի Իսլամական հնությունների թանգարանի (DAI) գլխավոր տնօրեն, Ալ-Սաբահ հավաքածուի համասեփականատեր Հուսա Սաբահ Ալ-Սալեմ Ալ-Սաբահը:

Շեյխուհին կայցելի մի շարք տեսարժան վայրեր և մշակութային հաստատություններ, այդ թվում՝ Մեսրոպ Մաշտոցի անվան հին ձեռագրերի գիտահետազոտական ինստիտուտ՝ Մատենադարան, Գաֆեսճյան արվեստի կենտրոն, Հայաստանի ազգային պատկերասրահ և պատմության թանգարան, կծանոթանա մեր ժողովրդի պատմամշակութային ժառանգությանը։ Կքննարկվի նաև հանրահայտ Ալ-Սաբահ հավաքածուի նմուշները Երևանում ցուցադրելու հնարավորությունը։

Ալ-Սաբահ հավաքածուն ներառում է արվեստի արժեքավոր նմուշներ, այդ թվում՝ եզակի ձեռագրեր, գորգեր, թանկարժեք զարդեր, կերամիկական և մետաղական, փայտից ու ապակուց պատրաստված աշխատանքներ: Հավաքածուի ավելի քան 30 հազար նմուշները ներկայացնում են տարբեր երկրների մշակույթն ու արվեստը և աշխարհագրական ու ժամանակագրական տարբեր շրջանների են պատկանում։

Շեյխուհի Հուսա Սաբահ Ալ-Սալեմ Ալ-Սաբահը Մերձավոր Արևելքի, Եվրոպայի և ԱՄՆ-ի համալսարաններում ու մշակութային ինստիտուտներում պարբերաբար հանդես է գալիս դասախոսություններով՝ նվիրված իսլամական մշակույթին և արվեստին: Նա ակտիվորեն ներգրավված է ճարտարապետական կոթողների պահպանության գործում, մասնավորապես, աշխատանքներ է իրականացնում Բահրեյնի, Սիրիայի և Եգիպտոսի պատմական շինությունները պահպանելու և վերականգնելու ուղղությամբ:

*

*