Ադրբեջանը չունի միջազգայնորեն ճանաչված սահմաններ՝ բացի նրա ռուս-ադրբեջանական հատվածից. Արցախի ԱԳՆ

«Տարակուսանք են առաջացնում Վրաստանի եւ Ուկրաինայի ԱԳՆ հայտարարությունները...»
artsaxi-agn3

Վրաստանի եւ Ուկրաինայի ԱԳՆ հայտարարություններն իրենց ասոցացնում են  Ադրբեջանի հակաժողովրդավարական վարչակարգի հետ: Այս մասին հայտարարություն է տարածել Արցախի ԱԳՆ-ն:

Հայտարարությունում, մասնավորապես, ասվում է.

«Սեպտեմբերի 8-ին Արցախի Հանրապետությունում կայացել են տեղական ինքնակառավարման մարմինների ընտրություններ, որոնք դարձան Արցախի իշխանությունների եւ հանրության հերթական նվաճումը հանրապետությունում ժողովրդավարական ինստիտուտների հետեւողական զարգացման ու ամրապնդման գործընթացում։

Անցկացված ընտրությունների վերաբերյալ Ադրբեջանի իշխանությունների նյարդային արձագանքը կանխատեսելի էր, որը ոչ միայն Արցախի քաղաքացիների հիմնարար իրավունքների, այլեւ, առհասարակ, ժողովրդավարական արժեքների մերժման հերթական դրսեւորումը դարձավ։

Տարակուսանք են առաջացնում  Վրաստանի եւ Ուկրաինայի ԱԳՆ հայտարարությունները, որոնք իրենց ասոցացնում են  Ադրբեջանի հակաժողովրդավարական վարչակարգի հետ։ Այդօրինակ հայտարարությունները ոչ միայն հակասում են ժողովրդավարական արժեքների նկատմամբ Վրաստանի եւ Ուկրաինայի կողմից հռչակված նվիրվածությանը, այլեւ հանդիսանում են Արցախի Հանրապետության ներքին գործերին միջամտություն եւ խախտում են  ժողովուրդների իրավահավասարության եւ պետությունների ինքնիշխան հավասարության սկզբունքները։

Վրաստանի եւ Ուկրաինայի ԱԳՆ հայտարարությունները նաեւ պարունակում են դրույթներ, որոնք խեղաթյուրում են ադրբեջանա-ղարաբաղյան հակամարտության էությունը՝ նպատակ ունենալով այն ներկայացնել որպես տարածքային վեճ եւ աջակցություն հայտնել, այսպես կոչված, Ադրբեջանի միջազգայնորեն ճանաչված սահմաններին։

Այս կապակցությամբ վրացական եւ ուկրաինական կողմերին կցանկանայինք հիշեցնել, որ Ադրբեջանը չունի միջազգայնորեն ճանաչված սահմաններ՝ բացի նրա ռուս-ադրբեջանական հատվածից։ Ավելին՝ վրաց-ադրբեջանական սահմանի զգալի մասը առայսօր վերջնականորեն համաձայնեցված չէ։ Հստակեցված չեն Ադրբեջանի սահմանները ոչ միայն Վրաստանի, այլեւ հարեւան այլ երկրների հետ։ Նրանցից որոշների հետ անգամ չի սկսվել սահմանազատման եւ սահմանների եզրանշման գործընթացը:

Կոչ ենք անում Վրաստանի եւ Ուկրաինայի իշխանություններին հավատարիմ մնալ իրենց հռչակած արժեհամակարգին՝ հիմնված ժողովրդավարական սկզբունքների, մարդու իրավունքների եւ ազատությունների վրա, եւ հետագայում զերծ մնալ այնպիսի հայտարարություններից, որոնք վերաբերում են միջազգային հիմնարար փաստաթղթերում ամրագրված՝ Արցախի Հանրապետության քաղաքացիների հիմնարար իրավունքների իրացմանը»։

*

*

Լրահոս

Բոլոր նորությունները